Josephine Myrtle Corbin wavukiye muri Leta ya Texas yo mu Leta Zunze Ubumwe za Amerika, ni umwe mu bantu bamenyekanye kubera kuvukana amaguru ane, akagira imyanya myibarukiro ibiri imbere n’inyuma ndeste akaza no kubaka urugo akabyara abana bane.

Josephine Myrtle Corbin yari afite ubuzima nk’ubw’undi mukobwa mu buryo bwose. Kuvuka kwe nta kindi cyabayemo kidasanzwe uretse ko umubyeyi we yamaze igihe kirekire ku nda bitewe n’uburyo umwana yari ameze mu nda (position) bwatumye avuka abanje amaguru.

Inkuru ya allthatsinteresting.com ivuga ko Umuganga wapimye uwo mwana amaze kuvuka yavuze ko afite ubuzima bwiza kandi akomeye, yongeraho ko afite n’ibiro bikwiye. Nyuma y’umwaka yakomeje kugaragraga ko ameze neza kandi n’ibice by’umubiri biri gukura neza.

Uretse kugira amaguru ane ni umukobwa wakuze afite ubuzima bwiza.

Nyuma yo kuvukana amaguru ane, abiri afite ingano y’amaguru asanzwe n’utundi duto cyane, muganga wamubyaje yifuje kumenya icyatuma umwana avuka ameze atyo.

Muganga yavuze ko “Icya mbere ababyeyi be bari bafite ikinyuranyo cy’imyaka 10 kuko, se William H. Corbin yari afite imyaka 25 y’amavuko naho umugore we Nancy afite 34.”

Icya kabiri bombi bari bafite imisatsi ijya kugira ibara ritukura, amaso y’ubururu kandi basa cyane cyane mu maso. Ibyo byatumye yifuza kureba niba nta sano bafitanye hagendewe ku bizamini byo mu maraso.”

Nubwo uwo muganga yavuze ibyo, bikanagaragara ko uwo mwana adasanzwe, ababyeyi be bari bafite abandi bana barindwi bafite imiterere isanzwe.

Nyuma byaje kugaragara ko mu mikurire y’umubiri we habayeho ikibazo mu magufwa yo mu rukenyerero aho igufa rinini ry’akuguru rifatira habayeho ikibazo hazaho abiri kuri buri ruhande, bituma amaguru aba ane.

Uko yabaye umunyabirori ukomeye

Mu 1881 afite imyaka 13, Myrtle Corbin yatangiye kujya mu birori n’ibitaramo, afata izina ‘ry’umukobwa w’amaguru ane wo muri Texas (The Four-Legged Girl From Texas).

Nyuma yo kubona ko akunzwe ndetse agatangira kwishyuza abamureba, se umubyara yabonye ko ashobora kujya yamamaza cyangwa agakorera amafaranga. Atangira kumwamamaza mu binyamakuru ahamagarira abantu kuza kumureba.

Yahise amenyekana aza no gutangira kugenda mu mijyi akora ibitaramo kuburyo yageze aho yinjiza $ 450 ku cyumweru.

Icyo gihe niho yamenyanye n’umunyamerika w’umucuruzi akaba n’umunyapolitiki, P.T Barnum ahita amuha akazi ko kujya amukorera mu birori n’ibitaramo yateguraga.

Mu myaka ine yakomeje gukorera Barnum ndetse abandi bantu bategura ibirori batangira kujya bigana abantu bafite amaguru ane, igihe babaga batabashije kumubona mu bitaramo byabo.

Afite imyaka 18 yavuye muri ibyo bitaramo. Yahuye n’umuganga witwa Clinton Bicknell barakundana, agize imyaka 19 barashyingiranwa.

Mu 1887 amaze umwaka arongowe, yarasamye. Ajya kwa muganga avuga ko aribwa mu ruhande rw’ibumoso, afite umuriro kandi aribwa umutwe. Kubera imiterere ye yihariye [imyanya myibarukiro ibiri imbere n’inyuma] muganga ntiyizeraga ko atwite.

Yararwaye cyane mu mezi atatu ya mbere yo gutwita kwe, kuburyo muganga yatekereje no kumukuriramo inda. Byarangiye mu buzima bwe abyaye abandi bana bane bameze neza.

Nyuma yo kuva mu bitaramo no kubyara, yabayeho ubuzima busanzwe nubwo amakuru ye yahoraga avugwa mu by’ubuzima ariko yariturije akajya yirinda kugira icyo abivugaho.

Mu 1928 yapfuye azize indwara yitwa ‘streptococcal skin infection’ ifata uruhu.

Amafoto

_____

Written by Nelson Mucyo

LEAVE A REPLY

Please enter your comment!
Please enter your name here